Náttúrufórnir í Krýsuvík - í sátt við umhverfið?

Krýsuvík tilheyrir Reykjanesfólkvangi og er afar vinsælt útivistarsvæði
í nágrenni við mesta þéttbýlissvæði landsins.

Þessari útivistarparadís og náttúruperlum hennar  stendur til að fórna undir orkuvinnslu .

HS Orka, sem nú er nær alfarið í eigu útlendinga, hyggst virkja svæðið fyrir erlenda álbræðslu í Helguvík.

Virkjunaráform í Krýsuvík hljóða upp á orkuvinnslu samsvarandi fjórum til fimm Reykjanesvirkjunum eða 450 - 500MV.

Orkunni verður að mestu ráðstafað til álvers í Helguvík sem alls þarf um 630MV.

Það er ekki erfitt að ímynda sér þá ásýnd sem svæðið  fær, gangi þessi áform erftir. Eingöngu borstæðið undir Hverafjalli yrði átta þúsund fermetrar.

Þá er eftir að telja upp önnur borstæði og öll þau mannvirki sem  þessum framkvæmdum fylgja : Stöðvarhús, hitaveiturör, vegalagning, háspennulínur og fl.

Byrjað yrði að bora á þremur stöðum: Í Seltúni, undir Hverafjalli og undir Austurengjahver.

Sumir hafa reynt að  réttlæta þessi áform með þeim rökum að nú þegar sé búið að raska svæðinu með rannsóknarborunum.

Þau rök halda ekki því  það rask sem þegar hefur  verið unnið er hjóm eitt í samanburði við það sem koma skal.

Krýsuvík er ein fegursta náttúruperla Íslands. Fölbreytt litadýrð náttúrunnar á hverasvæðunum í Seltúni og á Austurengjahæð laðar að margan ferðamanninn

og náttúruunnandan. Krýsuvík er meðal vinsælustu viðkomustaða erlendra ferðamanna í dagsferðum frá Reykjavík.

Ekki alls fyrir löngu eyðilagði HS Orka aðgengi að öðrum vinsælum viðkomustað á Reykjanesinu - Gunnuhver.

Boranir undir hverinn höfðu þau áhrif að virkni í honum jókst með þeim afleiðingum að vegur á svæðinu

og önnur mannvirki  sem tryggðu aðgengi að hvernum, eyðilögðust.

Svæðinu var lokað og hefur það stórskaðað ferðaþjónustu á svæðinu að mati  Umhverfisstofnunar.

Er þá ekki líklegt að það sama gerist þegar borað verður undir Seltún í Krýsuvík?

Fyrirtækið sem stóð að þessu kveinkar sér undan fjárskorti til að gera svæðið við Gunnuhver aðgengilegt ferðamönnum að nýju.

Þetta sama fyrirtæki slær um sig með slagorðinu „Í sátt við umhverfið".

Það er vonandi að bæjaryfirvöld í Hafnarfirði standi í lappirnar þegar kemur að því að fjalla um framkvæmdaleyfi fyrir tilraunaboranir  á Krýsuvíkursvæðinu.

Eru bæjarbúar í Hafnarfirði sáttir við að helstu útivistarperlu þeirra verði breytt í orkuvinnslusvæði?

Myndin hér að neðan er  tekin af virkjunarsvæði Hellisheiðarvirkjunar. Eitthvað þessu líkt gæti ásýnd Krýsuvíkur orðið. Viljum við það?

Hér á næstu síðum er fjöldi ljósmynda frá Krýsuvíkursvæðinu, þessari einstöku náttúru- og útivistarparadís í hlaðvarpanum á mesta þéttbýlissvæði landsins.

Ljósmyndagallerí frá Krýsuvík :
 

Hellisheiðarvirkjun - Viljum við þetta í Krýsuvík?